«البصّة في طبق غيرك عمرها ما تشبعك»
كتب
الاستاذ: محمد مجدي وحش المحامي
مقولة بسيطة في لفظها، عميقة في معناها، لأنها بتلمس حقيقة بنعيشها كل يوم.
اللي دايمًا عينه على رزق غيره، عمره ما هيحس بالرضا، حتى لو كان عنده كتير.
الطمع مش في قلة الرزق، الطمع في عدم القناعة.
كل واحد فينا ليه رزقه، وليه طريقه، وليه وقته.
والمقارنات المستمرة بتسرق مننا راحة البال، وتخلينا نشوف اللي ناقص بدل ما نشوف النعمة اللي في إيدينا.
يمكن غيرك عنده حاجة أنت بتتمناها، لكنه في نفس الوقت يتمنى حاجة عندك أنت.
القناعة مش معناها الكسل، ولا الرضا بالظلم،
لكن معناها إنك تسعى وتجتهد وتبذل اللي عليك،
وفي نفس الوقت تبقى راضي بما قسمه الله لك،
لأن الرضا هو الشبع الحقيقي، وهو راحة القلب قبل ما يكون امتلاء اليد.
خليك مركز في طبقك، في تعبك، في حلمك،
وسيِب غيرك لربنا،
لأن اللي اتكتب لك هيوصلك،
واللي مش من نصيبك مهما بصّيت عليه مش هيكون لك.
القناعة كنز…
والبصّة في طبق غيرك عمرها ما تشبعك.
